Fin og frodig frøstjerne!

Heilt ifrå starten som hageentusiast har eg vore fasinert av frøstjerner. Og det er ikkje få frøposer eg har kjøpt inn forgjeves, kort sagt eg fekk aldri frøstjernene til å spire. Så ga eg opp, heilt til ifjor. Då fekk eg kjøpe ein tuslete liten plante, men med lapp om at det var av ein gamal og herdig sort. Og slik ser akeleiefrøstjerna ut no! Nydeleg bladverk og luftige blomster som står lenge.  Det er ikkje så ofte eg ser frøstjerner i hagane, dei har kanskje gått av mote? I dei gamle hagane var frøstjernene mykje brukt, og i forskjellige farger. Så - fram for frøstjerner!

Kongen av Danmark

Eg har ikkje tenkt å skrive om monarkiet i Danmark, men om spansk kjørvel, Myrrhis odorata. For mange år sidan oppdaga eg ein bestand av planta i veigrøfta utanfor ein kjent herregard. Eg fantaserte om at den spanske kjørvelen kom opprinneleg frå ein flott urtehage, og det var etterkomarane som sto der i grøfta. Så ein kveld dro vi ut med spade for å grave opp eit eksemplar. Det tok tid, veigrøfter er som kjent fulle av stein! Men til slutt fekk vi opp ein rotbit som vart heimført i triumf.  Planta vaks til og har vore i hagen i alle år etterpå. Og så til overskrifta: Blada duftar så nydeleg av anis, og gir meg gode minner frå barndommen om dei brune, sekskanta dropsa med krone....

Vannlilje i hagen....

Eg ønsker meg vannlilje i hagen! Og så veit eg at der vil vere til salgs vannliljer på Vårtreffet til Botanisk hages Venner 3. juni.  Men kva hjelp er det når eg ikkje har dam i hagen? Ei mulegheit er å få mannen min til å gi avkall på den store blå plasttønna vi brukar til oppbevaring av redskap. Eller skal eg hale ned fra loftet den gamle vinballongen og få ein glasmeister til å sage av toppen? Kanskje det ikkje går an å dyrke vannlilje under så enkle forhold?  Da får eg nøye meg med å nyte dei ute i det fri!

Ramsløk - vakker og illeluktande

No blomstrar ramsløken i hagen! Og slik ein vakker og elegant blomst med det frodige bladverket!  Legg merke til at eg skreiv vakker før illeluktande.... Så ille er ikkje lukta forresten. Blada er eit ypperleg råstoff til pesto for dei med dristig smak.  Og dersom ein ikkje vil lage pesto, så er eit grønt bladdryss over salaten eller aromasmør ein fin måte å nytte planten på. Så har du ikkje ramsløk i hagen, gå ut i naturen og plukk! Husk berre på at liljekonvall kan vere lik i blada, ta alltid ein luktprøve...

Løvetann - mitt favorittugras!

Det er noke med meg og løvetann. Eg synest det er ein fantastisk plante, så lysende skinande gul, struttande av kraft og optimisme... I tillegg har eg mine gode barndomsminner der eg  laga lange lenker av løvetannstilkar med klissete fingrar. Mor mi visste at løvetannblad kunne brukast som salat, men det vart aldri utprøvd i heimen. I vaksen alder har eg lært at blada må bleikast for å få bort bittersmaken, dvs eg har også lest at det ikkje nyttar, ein bitter løvetann forblir ein bitter løvetann. Sjøl fekk eg ein salatløvetann av ei veninne. Det var ein skikkeleg broilerløvetann som kom opp med ein kjempeblomst! Den tok eg bort, tenk om den sette frø! Det viste seg at salatløvetanna var for tander for norsk klima og forsvann første vinteren.  Løvetannblomst - berre det gule - er fint til å produsere gelé av. Og skikkeleg laga løvetannvin kan vere utruleg god! Her er ei oppskrift på saft frå Inger-Lise Østmo: 1 l løvetannblomst uten det grøne, 1 l vatn, 1 kg sukker, 1 pose sitronsyre 25 g. Legg blomster, sukker og sitronsyre i plast- eller stålkjele, hell kokende vatn over og la trekke 3 - 5 dager. Sil fra og bland med vatn etter smak og behag. Kan frysast.

Vår i hagen!

Mai månad har vore kald og regnvåt.  Men blomster dukkar opp i hagen, og vi skal vel sjå positivt på at blomster varer lenger i slikt ver? Her er noke av det som gled meg no: Primula, trillium og vårskjærminne!

Vårtreff 3. juni i Botanisk hage på Tøyen

 Botanisk hages Venner er venneforeninga til Botanisk hage på Tøyen.  Vårtreffet er det store arrangementet til foreninga med mange aktiviteter den dagen.  Men først og fremst dreier det seg om salg av planter.  Plantegruppa i BhV starter opp allereie i februar med å så dei første frøa.  Og så går det slag i slag med prikling, ompotting, oppbinding av klatreplanter, osv. osv. Alt må vere klart til den store dagen! Her er nokre bilde frå aktiviteten akkurat no. Og engletrompeten er altfor tidleg ute! Nederste bildet viser små valmuesøstre. Så mange var der igjen etter at gruppa hadde prikla ut 280 stk.....